चित्त विचलित व अशांत असताना, आपली बुद्धी संपूर्णपणे, चित्त स्थिर व शांत करण्यावर केंद्रित करणे, म्हणजे बुद्धीचा सर्वोत्तम वापर होय.

तंत्रज्ञान आपल्याला दैनंदिन कामात मदत करण्यासाठी व आपले जीवन सहजसोपे करण्यासाठी आणि ताणतणाव व गुंतागुंत कमी करण्यासाठी आहे.

आपली मनस्थिती ठीक नसेल, तेव्हा स्वतःशी योग्य व व्यावहारिक बोलण्याची आणि स्वतःला माणसाप्रमाणे व न्यायबुद्धीने वागवण्याची गरज असते.

आपल्याला आपला कोणताही विकास करण्यापासून रोखणारे व खाली खेचणारे जवळपास सर्व खेकडे, आपल्याच मनात असतात; जनात नव्हे.

जी कामे आपण उत्तम क्षमतेने, गुणवत्तापूर्ण व आनंदाने करतो, ती काळजीपूर्वक शोधणे व करत राहणे म्हणजे प्रतिभावंत होणे.

आपल्या मनाचा तोल ढळत असेल तर आपण एका टोकाचा विचार करतोय, समतोल राखण्यासाठी संतुलित विचारांचा शोध घेणे गरजेचे आहे.

आपली महत्त्वाची कामे लवकर पूर्ण करून, उरलेला वेळ आपल्यावर प्रेम करणाऱ्या कुटुंबीयांसोबत आनंदात घालवणे, म्हणजे वेळेचे नियोजन.

आपला कमकुवतपणा अयोग्य व तर्कविसंगत असल्याचे ठरवून, स्वतःचा बचाव करण्याचे बंद करून, आपण त्यावर मात करू शकतो.

आपण आपल्या जीवनात येणाऱ्या सुखदुःखांचा, जेव्हा काही उत्तमोत्तम असा अर्थ काढतो, तेव्हा आपण आपले जीवन यथार्थ बनवत असतो.

एखादा अयशस्वी होऊनही,जर त्यातून काहीतरी शिकण्याचा व स्व:क्षमता वाढवण्याचा प्रयत्न करीत असेल, तर त्याला यशस्वीच म्हणावे लागेल.