जीवनाच्या परिक्षेत अभ्यासक्रम ठरवणारे, शिकवणारे, शिकणारे, पेपर सेट करणारे, लिहिणारे, तपासणारे व निकाल देणारे सारेकाही एकमेव आपण स्वतःच आहोत, हे समजून घ्यायला शिकूया.

आपला अनुभव आपला असतो, इतरांचा अनुभव इतरांचा, अनुभव मूल्यवान असतात पण आव्हान समान असेल तरीही अनुभव समान व एकसारखे कधीही नसतात, हे समजून घ्यायला शिकूया.

आपल्याला पडणारे प्रश्न, त्या प्रश्नांच्या उत्तरासाठी केलेली धडपड, त्यातून मिळालेली काही उत्तरे, त्या उत्तरांमधून पुन्हा पडणारे प्रश्न, अशी प्रश्नांची अखंड मालिका म्हणजेच आपले जीवन होय.

चांगले वळण फक्त विचारांत व डोक्यात असेल तर ती आपली डोकेदुखी ठरते, तेच चांगले वळण सरावाने अंगवळणी पडल्यास आपल्या यशाचे गमक ठरू शकते.

“कळतंय पण वळत नाही”, अशा अवस्थेत आपल्या बुद्धीला कळलेले असते, मनाला व ह्रदयाला नाही ज्यांचे वळवणे हे काम आहे, हे समजून घ्यायला शिकूया.

आपल्या मनात येणाऱ्या नकारात्मक भावनांपासून मुक्त होण्यासाठी त्यांना विरोध करणे टाळणे व त्यांना आपल्या अंतर्मनातून सखोल जाणून घेणे,  हे सर्वोत्तम पर्याय वापरायला सुरुवात करूया.

आपले मन, ध्यान, स्मृती व विचार जेथे असतील तेच त्या क्षणासाठी आपले वास्तविक जग असते व त्यानुसार आपण प्रतिक्रीयाही देतो, मग शरीराने आपण कोठेही असो, हे समजून घ्यायला शिकूया.

भविष्यात कधीतरी वेळ आल्यावर वेळेबद्दल विचार करून अमूल्य वेळ वाया घालवण्याऐवजी आजच आपल्या त्या अमूल्य वेळेचा विचार करण्यासाठी वेळ काढायला सुरुवात करूया.

आपण मिळवलेल्या ज्ञानाने जर आपला अहंकार व अभिमान गळून पडले तर ते सज्ञान आणि जर वाढू लागले तर ते अज्ञान, हे समजून घ्यायला शिकूया.

“आमचं नक्की ठरलंय, आम्ही पक्कं ठरवलंय” अशी आपली अवस्था असेल तर कसलीही संगत, परिस्थिती किंवा मनस्थिती आपल्याला बदलणार नाही, हे समजून घ्यायला शिकूया.