क्षणोक्षणी आपण मनाला जे काही सांगतो किंवा मन आपल्याला जे काही सांगते, तेच आपण कोणत्या काळात जगत आहोत हे ठरवत असते, हे समजून घ्यायला शिकूया.

आपण इतरांबद्दल शुभ विचार व शुभ चिंतन करणे ही आपले स्वत:चे शुभ, कल्याण व चांगले होण्यासाठीची पहिली व खूप गरजेची पायरी आहे, हे समजून घ्यायला शिकूया.

निर्भय होणे म्हणजे कधीही न घाबरणे असे नव्हे, तर भितीतील आंतरिक ऊर्जेचे रूपांतर, काही विधायक व रचनात्मक ऊर्जेत करायला शिकणे, हे समजून घ्यायला शिकूया.

यशस्वी आयुष्य म्हणजे आपल्या मनातील वेगवेगळ्या भीत्यांना व काळज्यांना चितपट करण्यासाठी आपणच शोधलेल्या नानाविध मार्गांची गोळाबेरीज, हे समजून घ्यायला शिकूया.

जे काम आपल्याला बिलकुलच आवडत नाही, ते काहीतरी दुसऱ्या एखाद्या फायद्यासाठी जबरदस्तीने करणे, म्हणजे आपल्या आनंदाला ग्रहण लावणे आहे, हे समजून घ्यायला शिकूया.

‘करुणा, प्रेम व दया’ देणाऱ्यांनी ती घेणाऱ्यांबरोबरच, ती देणाऱ्यांबरोबरही रहावे, नेहमी देणाऱ्याला सुध्दा त्यांची कधीतरी गरज पडू शकते, हे समजून घ्यायला शिकूया.

आपल्या कल्पना, मान्यता, विचार व दृष्टीकोन यांतून काल्पनिक समस्या तयार होतात तर प्रत्यक्ष कृतीतून मात्र वास्तविक समस्या तयार होतात, हे समजून घ्यायला शिकूया.

दिशाहीन, अस्तित्वहीन व तर्कहीन मान्यतांतून तयार होणारे आपले आचार-विचार व आहार-विहार हेच आपले सर्वात मोठ्ठे शत्रू आहेत, हे समजून घ्यायला शिकूया.

प्रश्नातून प्रश्न तयार करणाऱ्या पुनपून्हा गोलगोल फिरवणाऱ्या विचारांच्या जागेवर पर्याय तयार करणाऱ्या व गोलाबाहेर  पडायला मदत करणाऱ्या विचारांना निवडायला शिकूया.

गडबडीत निरुद्देश व नकारात्मक प्रतिक्रिया देण्यात वाया जाणारी आपली भावनिक ऊर्जा वाचवून हळूहळू ती स्व:जाण, स्व:जागृती व स्व:विकास या सत्कार्याकडे वळवायला शिकूयात.