आपल्याला जर कोणी मोठी व महान व्यक्ती बनायचे असेल तर मोठ्या व महान व्यक्तींनी तोंड दिलेल्या मोठ्या अडचणींना तशाच प्रकारे व त्याच मूळ कारणांसाठी सामोरं जायला सुरुवात करायला शिकूया.

आपण जर इतरांना कमी लेखले तर इतरांकडून आपल्याला मोठे व ज्ञानी लेखले जाण्याऐवजी कमी व अज्ञानी लेखले जाण्याचीच शक्यता जास्त असणार, हे समजून घ्यायला शिकूया.

आपले स्वतःचे वैयक्तीक प्रश्न व समस्या दुसऱ्यांना दोष देऊन, त्यांच्या उणिवा शोधून किंवा त्यांना घालूनपाडून बोलून कधीही सुटू शकणार नाहीत, हे समजून घ्यायला शिकूया.

आपली किंमत आपल्या स्वतःच्या एखाद्या चुकीच्या कृतीमुळे, इतर कोणाच्यातरी नजरेत कमी किंवा जास्त होण्यामुळे ती लगेचच बदलू शकत नाही, हे समजून घ्यायला शिकूया.

आपल्याला महत्वाची, योग्य व बरोबर वाटणारी गोष्ट आपल्या जवळच्या इतरांनाही अगदी तशीच वाटावी हा हट्ट धरणे आपण शांतपणे कमी करायला सुरुवात करूयात.

कोणत्याही कामाच्या चांगल्या सुरूवातीसाठी सर्वात प्रथम जी गोष्ट अतिशय आवश्यक आहे, ती म्हणजे “आपल्या मनाची तयारी व त्यातील आपल्या मनाची एकाग्रता” हे समजून घ्यायला शिकूया.

एखाद्या समस्याग्रस्त किंवा दुःखी माणसाला भेटायला जाताना भेट म्हणून “त्यांच्यासाठी चांगली व खास अशी एखादी माहिती किंवा बातमी”, सोबत घेऊन जायला सुरुवात करायला शिकूया.

आपली सगळ्यात मोठी ताकद किंवा कमजोरी आपल्या आजूबाजूच्या प्रत्येक गोष्टीकडे पाहण्याचा आपला दृष्टिकोन किंवा आपले अंदाज, गणित व अनुमान असतात, हे समजून घ्यायला शिकूया.

आजूबाजूचे लोक आपल्याला वारंवार दुःखी, उदास, नाराज व वैफल्यग्रस्त वाटायला लागले तर, आपण स्वतः त्याच व तशाच मनःस्थितीत असण्याची शक्यता आहे, हे समजून घ्यायला शिकूया.

आपला मूड चाळणीचे काम करतो, त्यातून फक्त आपल्या सध्याच्या मूडला अनुरूप चाळलेल्या विचार व आठवणीच आपल्या समोर हजर होतात, म्हणून आपल्या मूडवर लक्ष ठेवायला शिकूयात.