आपल्या मनात येणाऱ्या विविध भावभावनांचे आपल्या जीवनावर व मनावर आत्ता लगेच व भविष्यात काय काय परिणाम होतात? ते एक त्रयस्थ व अनोळखी व्यक्ती होऊन पहायला शिकूया.

आपल्या मनातील पूजनीय, आदर्शवत व अनुकरणीय प्रतिमा नेहमी माणसांच्याच असतात, ज्यांची काही शक्तीस्थाने तर काही उणीवा या असणारच, हे समजून घ्यायला शिकूया.

इतरांचा विनाअट स्विकार करणे व त्यांचेवर बोचरी टीका न करणे सहजसाध्य होण्यासाठी अगोदर आपण आपला स्वतःचा जसा आहे तसा स्विकार करायला शिकूया.

आपण योग्य असूनही आपल्याला फळ म्हणून नकार, अवहेलना, अपमान व अयोग्य परिणाम मिळत असतील, तरीही आपण मात्र योग्यच राहणे म्हणजे खरे चारित्र्य, हे समजून घ्यायला शिकूया.

परिस्थितीला किंवा व्यक्तीला प्रतिक्रिया देत असताना अगोदर आपल्या शरीरातील व मनातील बदल ओळखून त्या बदलांना साजेशा भावनेचे नाव आणि संदर्भ द्यायला सुरुवात करायला शिकूया.

आपल्या प्रतिक्रिया बऱ्याच वेळा आत्ताच्या घटनेबाबत नसून आपल्या किंवा इतरांच्या जीवनातील घडून गेलेल्या पूर्वीच्या घटना, गोष्टी किंवा अनुभवांबाबत असतात, हे समजून घ्यायला शिकूया.

आपण आपल्या स्वतःच्या आदिम, खोल व आंतरिक भावनांचा संदर्भ व मतितार्थ जाणून घेऊन स्वतःसोबत अधिकाधिक संगनमताने व मैत्रभावाने वागायला शिकूया.

आपल्या स्वतःच्या सर्व प्रकारच्या भावभावना मोकळेपणाने व्यक्त करण्याची, समजावण्याची व समजून घेण्याची क्षमता हा आत्मविश्वासाचा पाया आहे, हे समजून घ्यायला शिकूया.

आपल्याला स्वतःलाच जर स्वतःबद्दल आणि स्वतःच्या गोष्टींबद्दल छान छान वाटत असेल तरच आपण आपल्या समोरच्या व्यक्तीच्या नजरेला नजर मिळवू शकतो, हे समजून घ्यायला शिकूया.

आपल्या डिग्रीमुळे, पदामुळे व उपाधीमुळे आपल्या साध्या व सहज शब्दांना वजन प्राप्त होत असते म्हणून आपण आपले शब्द काळजीपूर्वक मोजूनमापून वापरायला शिकूया.